Patres vestri manducavérunt manna in desérto, et mórtui sunt: hic est panis de cœlo descéndens: ut, si quis ex ipso manducáverit, non moriátur: Ego sum panis vivus, qui de cœlo descéndi...

Mentes nostras, quǽsumus, Dómine, Paráclitus, qui a te procédit, illúminet: et indúcat in omnem, sicut tuus promísit Fílius, veritátem: Qui tecum... in unitáte ejúsdem.

Today is Wednesday infra Octavam Pentecostes, that is the Wednesday Ember Day in Pentecoste. The Mass is Dum egredereris coram populo tuo. The libellus for Holy Mass at Saint-Eugène is here.

Statio ad Sanctam Mariam majorem

Introitus. Ps. 67, 8 et 9. Deus, dum egrederéris coram pópulo tuo, iter fáciens eis, hábitans in illis, allelúja: terra mota est, cœli distillavérunt, allelúja, allelúja. Ps. ibid., 2. Exsúrgat Deus, et dissipéntur inimíci ejus: et fúgiant, qui odérunt eum, a fácie ejus. V. Glória Patri.

The Ember Day vestments are violet i.e. it is a day for penitence and fasting, hence the two Lessons from Acts before the Gospel and the explicit rubrics anent the Kyrie and the Gloria; however, the Alleluias of the Pentecost Octave remain and the Sequentia.

Post Kýrie, eléison dicitur Orémus, sine Flectámus génua.

Oratio. Mentes nostras, quǽsumus, Dómine, Paráclitus, qui a te procédit, illúminet: et indúcat in omnem, sicut tuus promísit Fílius, veritátem: Qui tecum... in unitáte ejúsdem.

Léctio Actuum Apostolórum.
Act. 2, 14-21.
In diébus illis: Stans Petrus cum úndecim, levávit vocem suam, et locútus est eis: Viri Judǽi, et qui habitátis Jerúsalem univérsi, hoc vobis notum sit, et áuribus percípite verba mea. Non enim, sicut vos æstimátis, hi ébrii sunt, cum sit hora diéi tértia: sed hoc est, quod dictum est per Prophétam Joël: Et erit in novíssimis diébus (dicit Dóminus) effúndam de Spíritu meo super omnem carnem, et prophetábunt fílii vestri et fíliæ vestræ, et júvenes vestri visiónes vidébunt, et senióres vestri sómnia somniábunt. Et quidem super servos meos et super ancíllas meas in diébus illis effúndam de Spíritu meo, et prophetábunt: et dabo prodígia in cœlo sursum et signa in terra deórsum, sánguinem et ignem et vapórem fumi. Sol convertátur in ténebras et luna in sánguinem, antequam véniat dies Dómini magnus et maniféstus. Et erit: omnis, quicúm que invocáverit nomen Dómini, salvus erit.

Allelúja. ℣. Ps. 32, 6. Verbo Dómini cœli firmáti sunt, et Spíritu oris ejus omnis virtus eórum.

Hic dicitur Glória in excélsis Deo, et postea Dóminus vobíscum.

Oratio. Præsta, quǽsumus, omnípotens et miséricors Deus: ut Spíritus Sanctus advéniens, templum nos glóriæ suæ dignánter inhabitándo perfíciat. Per Dóminum... in unitáte ejusdem.

Léctio Actuum Apostolórum.
Act. 5, 12-16.
In diébus illis: Per manus autem Apostolórum fiébant signa et prodígia multa in plebe. Et erant unanímiter omnes in pórticu Salomónis. Ceterórum autem nemo audébat se conjúngere illis: sed magnificábat eos pópulus. Magis autem augebátur credéntium in Dómino multitúdo virórum ac mulíerum, ita ut in pláteas ejícerent infírmos, et pónerent in léctulis ac grabátis, ut, veniénte Petro, saltem umbra illíus obumbráret quemquam illórum, et liberaréntur ab infirmitátibus suis. Concurrébat autem et multitúdo vicinárum civitátum Jerúsalem, afferéntes ægros et vexátos a spirítibus immúndis: qui curabántur omnes.

Allelúja, allelúja. [Hic genuflectitur.] ℣. Veni, Sancte Spíritus, reple tuórum corda fidélium: et tui amóris in eis ignem accénde.

Sequentia.

Veni, Sancte Spíritus,
et emítte cǽlitus
lucis tuæ rádium.

Veni, pater páuperum;
veni, dator múnerum;
veni, lumen córdium.

Consolátor óptime,
dulcis hospes ánimæ,
dulce refrigérium.

In labóre réquies,
in æstu tempéries,
in fletu solácium.

O lux beatíssima,
reple cordis íntima
tuórum fidélium.

Sine tuo númine
nihil est in hómine,
nihil est innóxium.

Lava quod est sórdidum,
riga quod est áridum,
sana quod est sáucium.

Flecte quod est rígidum,
fove quod est frígidum,
rege quod est dévium.

Da tuis fidélibus,
in te confidéntibus,
sacrum septenárium.

Da virtútis méritum,
da salútis éxitum,
da perénne gáudium.
Amen. Allelúia.

 

✠ Sequéntia sancti Evangélii secúndum Joánnem.
Joann. 6, 44-52.
In illo témpore: Dixit Jesus turbis Judæórum: Nemo potest veníre ad me, nisi Pater, qui misit me, tráxerit eum: et ego resuscitábo eum in novíssimo die. Est scriptum in Prophétis: Et erunt omnes docíbiles Dei. Omnis, qui audívit a Patre et dídicit, venit ad me. Non quia Patrem vidit quisquam, nisi is, qui est a Deo, hic vidit Patrem. Amen, amen, dico vobis: qui credit in me, habet vitam ætérnam. Ego sum panis vitæ. Patres vestri manducavérunt manna in desérto, et mórtui sunt. Hic est panis de cœlo descéndens: ut, si quis ex ipso manducáverit, non moriátur. Ego sum panis vivus, qui de cœlo descéndi. Si quis manducáverit ex hoc sane, vivet in ætérnum: et panis, quem ego dabo, caro mea est pro mundi vita.

Credo.

At Saint-Eugène, the sequence Simplex in essentia of the blessed Adam of Saint-Victor will sung (with its second part sung at the Communio.

Simplex in esséntia,
Septiformis grátia,
Nos refórmet, Spíritus.

Cordis lustret ténebras,
Et carnis illécebras
Lux emíssa cœlitus.

Lex præcéssit in figúra,
Lex pœnális, lex obscúra,
Lumen Evangélicum.

Spiritális intelléctus,
Litteráli fronde tectus,
Pródeat in públicum.

Lex de monte pópulo,
Paucis in cœnáculo,
Nova datur grátia.

Situs docet nos locórum,
Præceptórum vel donórum
Quæ sit eminéntia.

Ignis, clangor buccínæ,
Fragor cum calígine,
Lámpadum discúrsio,

Terrórem incútiunt,
Nec amórem nútriunt,
Quem effúdit únctio.

Sic in Sina
Lex dívina
Reis est impósita,

Lex timóris
Non amóris,
Púniens illícita.

Ecce patres præelécti,
Dii recéntes effécti:
Culpæ solvunt víncula.

Pluunt verbo, tonant nimis:
Novis linguis et doctrínis
Cónsonant mirácula.

Exhibéntes ægris curam,
Morbum damnant non natúram,
Persequéntes scélera.

Reos premunt est castígant:
Modo solvunt, modo ligant,
Potestáte líbera.

Typum gerit jubiléi
Dies iste, si diei
Requíris mystéria:

In quo tribus míllibus
Ad fidem curréntibus,
Púllulat Ecclésia.

Jubiléus est vocátus
Vel dimíttens vel murátus,
Ad prióres vocans status
Res distráctas líbere.

Nos distráctos sub peccátis,
Líberet lex charitátis
Et perféctæ libertátis
Dignos reddat múnere. 

Amen.

Offertorium. Ps. 118, 47-48. Meditábor in mandátis tuis, quæ diléxi valde: et levábo manus meas ad mandáta tua, quæ diléxi, allelúja.

Secreta. Accipe, quǽsumus, Dómine, munus oblátum: et dignánter operáre; ut, quod mystériis ágimus, piis efféctibus celebrámus. Per Dóminum.

Præfatio de Spiritu Sancto (Le Barroux).

Vere dignum et justum est, æquum et salutáre, nos tibi semper et ubíque grátias ágere: Dómine sancte, Pater omnípotens, ætérne Deus: per Christum, Dóminum nostrum. Qui, ascéndens super omnes cælos sedénsque ad déxteram tuam, promíssum Spíritum Sanctum hodierna die in fílios adoptiónis effúdit. Quaprópter profúsis gáudiis totus in orbe terrárum mundus exsúltat. Sed et supérnæ Virtútes atque angélicæ Potestátes hymnum glóriæ tuæ cóncinunt, sine fine dicéntes:

Praefatio de Pentecoste (Saint-E.).

Vere dignum et justum est, æquum et salutáre, nos tibi semper, et ubíque grátias ágere: Dómine sancte, Pater omnípotens, ætérne Deus: per Christum Dóminum nostrum. Qui ascéndens super omnes cælos, sedénsque ad déxteram tuam, promíssum Spíritum Sanctum hodiérna die in fílios adoptiónis effúdit. Quaprópter profúsis gáudiis, totus in orbe terrárum mundus exsúltat. Sed et supérnæ Virtútes, atque angélicæ Potestátes, hymnum glóriæ tuæ cóncinunt, sine fine dicéntes:

Sanctus, Benedictus.

Agnus Dei.

Communio. Joann. 14, 27. Pacem relínquo vobis, allelúja: pacem meam do vobis, allelúja, allelúja.

Postcommunio. Suméntes, Dómine, cœléstia sacraménta, quǽsumus cleméntiam tuam: ut quod temporáliter gérimus ætérnis gáudiis consequámur. Per Dóminum.

✠    ✠    ✠

Concéde, miséricors Deus, fragilitáti nostræ præsídium; ut, qui sanctæ Dei Genitrícis memóriam ágimus; intercessiónis ejus auxílio, a nostris iniquitátibusresurgámus. Per Christum Dóminum nóstrum.

 

Deus, a quo sancta desidéria, recta consília, et justa sunt ópera: da servis tuis illam, quam mundus dare non potest, pacem; ut et corda nostra mandátis tuis dédita, et hóstium subláta formídine, témpora sint tua protectióne tranquílla. Per Dóminum.

Deus, qui caritátis dona per grátiam Sancti Spíritus tuórum fidélium córdibus infudísti: da fámulis et famulábus tuis, pro quibus tuam deprecámur cleméntiam, salútem mentis et córporis; ut te tota virtúte díligant, et quæ tibi plácita sunt, tota dilectióne perfíciant. Per Dóminum.

Laus Deo Virginique Matri